பாகிஸ்தானில் தேர்தல் பிரசாரப் பேரணியில் குண்டுவெடிப்பு - 20 பேர் பலி!

பாகிஸ்தானில் தேர்தல் பிரசாரத்தில் குண்டுவெடித்ததில் 20 பேர் பரிதாபமாக இறந்தனர். மேலும், 70 பேர் வரை படுகாயம் அடைந்துள்ளனர். பாகிஸ்தானில் வரும் 11ம் தேதி நாடாளுமன்ற தேர்தல் நடக்கிறது. இதற்கான பிரசாரம் உச்சகட்ட நிலையில் உள்ளது.இந்நிலையில், ஜமியத் உலேமா இ இஸ்லாம் பாஜி கட்சியின் சார்பில் மத்திய குர்ரம் பகுதியில் பிரசார பேரணி நடந்தது. அங்குள்ள மதராசாவில் இருந்து பேரணி தொடங்கியது. அப்போது அங்கு திடீரென குண்டுவெடித்தது. இதில், அங்கிருந்த 20 பேர் உடல்சிதறி பலியாகினர். மேலும், 70க்கும் மேற்பட்டவர்கள் படுகாயம் அடைந்தனர்.

கட்சியின் தலைவரும், முன்னாள் எம்.பி.யுமான முனிர் கான் ஒரக்ஜாய் காயங்களுடன் உயிர்தப்பினார். பழங்குடியினர் அதிகம் வசிக்கும் குர்ரம் பகுதியில் நடந்த இந்த குண்டுவெடிப்பால் அங்கு பெரும் பதற்றம் ஏற்பட்டுள்ளது. ஆனால், இதுவரையில் எந்த தீவிரவாத அமைப்பும் இந்த குண்டுவெடிப்புக்கு பொறுப்பு ஏற்கவில்லை.