சவூதியில் நிர்க்கதியான இலங்கையர்களை அழைத்து வர நடவடிக்கை

 

 

சவூதியில் நிர்க்கதியான இலங்கையர்களை அழைத்து வர நடவடிக்கை-
தொழில் வாய்ப்பிற்கான அடையாள அட்டை கால அவகாசம் நிறைவடைந்து, சவூதி அரேபிய ஜெட்டா நகரில் தங்கியுள்ள இலங்கையர்கள் அடுத்தவாரம் தொடக்கம் கட்டம் கட்டமாக தாயகத்திற்கு அழைத்து வரப்படவுள்ளதாக வெளிநாட்டு தொழில்வாய்ப்பு பணியகத்தின் ஊடகப் பேச்சாளரும், பிரதிப் பொதுமுகாமையாளருமான மங்கள ரண்தெனிய தெரிவித்துள்ளார்.

சவூதியில் உள்ள இலங்கை தூதுரகம், சவூதி அரசாங்கத்துடன் இது தொடர்பில் கலந்துரையாடி இணக்கப்பாடு காணப்பட்டுள்ளதாக அவர் குறிப்பிட்டுள்ளார்.

சவூதி அரேபியாவுக்கு தொழில் வாய்ப்பிற்காக செல்லும் ஏனைய நாடுகளைச் சேர்ந்தவர்களுக்கு அடையாள அட்டைகள் வழங்கப்படுவது வழக்கம். அவற்றின் காலவரையறை நிறைவடைந்த நிலையில் 4 ஆயிரத்திற்கும் அதிகமான இலங்கையர்கள் ஜெட்டா நகரில் தொழில் வாய்ப்பற்ற நிலையில் உள்ளனர்.

அண்மையில் சவூதி அரேபிய அரசாங்கம், குறித்த அடையாள அட்டை அற்றவர்களை தொழில்களில் இணைத்துக் கொள்ள கூடாது என்று தொழில் வழங்குனர்களுக்கு உத்தரவிட்டிருந்தமை குறிப்பிடத்தக்கது.

எனினும், தமக்கு நியாயம் கிடைக்க வேண்டியும், தொழில்வாய்ப்புகள் தரக் கோரியும் குறித்த பணியாளர்கள் போராட்டங்களை மேற்கொண்டிருந்தனர். இதன்போது, அந்த நாட்டு காவல்துறையினரால் அவர்களுக்கு பலவித அழுத்தங்கள் பிரயோகிக்கப்பட்டிருந்தன.

ஆரம்ப தொழில் ஸ்தானத்திலிருந்து வெளியேறி இலங்கையர்கள் போன்றே இந்தியா, பாக்கிஸ்தான், பங்களாதேஷ் போன்ற நாடுகளைச் சேர்ந்தவர்களும் ஜெட்டா நகரில் தங்கியுள்ளனர்.

எவ்வாறாயினும், இலங்கை அதிகாரிகள் மேற்கொண்ட கலந்துரையாடல்களின் அடிப்படையில் இலங்கை பணியாளர்கள் தமது ஆரம்ப தொழில் ஸ்தானத்திற்கு செல்வதற்கு சவுதி அரசாங்கம் 3 மாத கால அவகாசம் வழங்கியிருந்தமை குறிப்பிடத்தக்கது.

கொள்ளைச் சம்பவம் தொடர்பாக ஏழுபேர் கைது-
சுமார் 42 லட்ச ரூபா கொள்ளையிடப்பட்ட சம்பவம் தொடர்பில் 7 பேரை மாத்தளை பொலிஸர் கைது செய்துள்ளனர்.

மாத்தளை பிரதேசத்தில் உள்ள மதுபான விற்பனை நிலையம் ஒன்றின் உரிமையாளரது வீட்டிலிருந்து கடந்த 17ம் திகதி இந்த சந்தேகநபர்கள் பணத்தை கொள்ளையிட்டுள்ளனர்.

இதுபற்றி விசாரணை செய்த மாத்தளை பொலிஸார் நேற்று கண்டியில் சந்தேகநபர் ஒருவருடன் பெண் ஒருவரையும் கைது செய்துள்ளனர்.

இவர்களிடம் நடத்திய விசாரணைகளை தொடர்ந்து மேலும் ஐந்து பேரை மாதளை அவட பிரதேசத்தில் வைத்து பொலிஸர் கைது செய்துள்ளனர்.

கைது செய்யப்பட்டவர்களிடம் மேற்கொண்ட விசாரணைகளின் பின்னதாக, அவர்களால் கொள்ளையிடப்பட்டு மறைத்து வைக்கப்பட்டிருந்த பணம் பொலிஸரால் மீட்கப்பட்டுள்ளது.

விளையாட்டு போட்டியில் சருக்குமரம் (கிறீஸ் மரம்) சரிந்து விழுந்தது-
தமிழ்-சிங்கள புதுவருட புத்தாண்டையொட்டி நடத்தப்பட்ட விளையாட்டு போட்டியில் சருக்குமரம் (கிறீஸ் மரம்) சரிந்து விழுந்ததில் பலர் படுகாயமடைந்துள்ளனர்.

அனுராதபுரம் தலாவே பகுதியில் இச்சம்பவம் (20) அன்று இடம்பெற்றுள்ளது.

காயமடைந்தவர்களில் இருவரின் நிலைமை கவலைக்கிடமாக இருப்பதாக பொலிஸார் தெரிவித்துள்ளனர்.